thi chah jiski mujhe...

bola tha weh jab janma tha yeh rishta
na tootega waada, na hoga andhera.
hai aaj bhi aankhon se paani ki rimjhim
na raah hai koi, na chalne ki shamta.
maanga to na tha bin kaanton ka jeevan
chaha tha keval prem ka basera.
diya hai tumne jo abhaav drishti ka
yeh wo roshni to nahi, thi chah jiski mujhe.

tha vishwaas jab samjha tha uski mamta ka vardaan
na hogi shikayat, na gila na shikwa.
hai aaj bhi aankhon mein khoj wahi
na raahat ki jhalak, na thikana manzil ka.
maanga to na tha bin tanhai ka jeevan
chaha tha keval weh saath pal bhar ka.
diya hai tumne jo tohfa zindagi ka
yeh wo saahil to nahi, thi chah jiski mujhe.

tha jagmagaata sa kshitij jab khole the pankh
na hoga khauf, na darr girne ka.
hai aaj bhi kheiton mein haryaali wahi
na sookhi mitti, na murjhaana foolon ka.
maangi to na thi un foolon mein khushboo
chahi thi keval aazaadi udne ki.
di hai tumne jo tamannayon mein hakikat
tum wo to nahi, thi chah jiski mujhe....